Op een geliende fietse noar de street-parade

3
878

Ik had mi-j op è-geem as vri-jwilleger um met te hülpen as et neudig was veur de viering van et honderdviemtwintigjoarig bestoan van de Westerhaar en de Wieke. Dat was al een hele tied geleen dat ik dat è-doane had. En doar eigenlijk al niet meer an è-dacht toen ze opbeln.

Of ik wel as verkeersregelaar wol hülpen bi-j de “street-parade”. Dan loopt er een aantal muziekkorpsen over de stroaten in`t dorp. Woarumme as ze dat zo nuumt weet ik niet want et was net zo as vrögger toen Soli Deo Gloria met aandere korpsen over de stroate leupen.
Toen nuum ze dat nog muziekoptocht. Mar dat zal wel oalderwets wezen vandoar “street-parade”. Goed, “natuurlijk wil ik dat wel”. Ik had dat nog nooit è-doane mar dat mus niet zo moeilijk wezen, dacht ik. Wi-j kregen een oamd doorveur ök nog een instructie over het hoe as alles verlopen mus. Iederiene die doar zat had et al is een keer met è-maakt . Behalve ikzülf dus. Mar dat gaf niks zeiden ze, ik kun wel saam met iene met die doar oarig goed in was.
Wi-j kreeg`n ök nog de bosköp met dat wi-j as et kun, op de fietse mussen koom want d`r kwaam een heleboele auto`s en doar mus zo veule mogelijk plekke veur bewaard bliem.
Umdat ik nogal verre weg woon mug ik bi-j uutzondering wel met de auto.
Toen as ik `s oams noa de instructie op huus an reed dacht ik : Ik liene wel een fietse van mien breur. En dat heb ik è-doane en è-weten.
Wi-j mussen oons de aandre dag verzameln bi-j het clubgebouw van de muziek.
Dat gebouw nuumt ze “Domus”.
Dat is een zelfde soort name as “Stobbe”, zoas ik mien appartement è-nuumt hebbe. Et betekent allebeide ongeveer etzelfde. Gebouw, huis, woning. Mar ja ‘Stobbe” is Drents en ‘Domus` is latijn. Dat klinkt wat deftiger.
Mar: ‘Stobbe` is veur mien appartement goed genög.
Dus ik op de fietse van mien breur op mien dooie gemakkie op ‘Domus`an. Ik was nog vrög genög. En ik had er nog gien arg in. Toen ik doar ankwam was er nog gien iene te zien die op een verkeersregelaar leek. Eem later kwam de eerste noa mi-j bin. Die wus ök weinig. Dus nog maar eem wachen. Ja wat mu-j aanders as d`r verder gien ménse is.
Toen degene die de leiding had er was en de briefies uutdeeln woarop stund woar iederien noar toe mus zee hij teeg`n mi-j dat ik saam met Luisman een korps mus begeleiden. Toen zee d`r iene dat Luisman met vekaansie in Limburg was.
Dat was veur mi-j te verre. Gien nood, dan goa ie mar met Gerrit Botter met, die weet ök overal van. Ök goed. Ik musse met een aantal op de fietse op de Westerhaar an. Et eerste stukkie gung nog wel. Eem later dacht ik: Wat fietst ze toch hard. Ik mus in de leegste versnelling mi-j al beroerd trappen. Eerst bleem d`r nog twee vlak bi-j mi-j fietsen mar halfweg de driesprong ( sorry rontonde) waar`n ze mi-j al een heel stuk veur
In de verte zag ik een aantal van de fietsers met dezülfde hessies die ik ök an had op Vroomshoop an fietsen. Ikke dus ök op “Skune Weg” an. Ik had terloops dat woord heurn valn. Umdat ik een endtie bindeur kun fietsen was ik er hoaste teglieke. Ik keek is rond: “is Gerrit d`r nog niet?”
“Die zal zo wel kom”. Ik was al met een paar meisies van een joar of achte van een majoretteclub die doar mus starten, bezig um mi-j te loaten demonstreer`n hoe goed ze met dat dreistokkie, woar die majorettes een speciale name veur hebt, umme kun goan, toen iene van de aandere verkeersleiders zee: “Ze bint oe kwiet, ie mut noar et viaduct noar de Garstweg”. Ik had nooit è-ziene dat er ök een aantal hessies de aandere kaante bij de driesprong op è-fietst waar`n
Goed.. ikke weer op de fietse, die nog steeds barses beroerd trapte, op et viaduct an. Doar an è-koom, mus, as ik uut è-hijgt was, weer met een aander, een korps begeleiden.
Meuk mi-j allemaole niks uut. Ze verteln mi-j dat ik bi-j de ofrit van rijksweg 36 mus goan stoan um et verkeer dat doar vanof kwam teeg`n te hoaln.
Ik vuuln mi-j al een echte verkeersregelaar. Mar d`r kwam natuurlijk gien ien auto die ik met de arms wieduut kun loaten stoppen. Niks kwam d`r van die kaante an.
Nog gien motor met ziedspan gien brommer en zulfs gien fietse. Die mug doar trouwens ök niet köm. Ik was al tevreen è-west met et kleinste autogie al had ik liever een dikke mercedus teegnhoaln.
Ik vuuln mi-j toch wel wat teleurè-steld.
Mar goed et was niet aans, op noar et volgnde kruuspunt. Zegge een schrijve heb ik doar ök mar ien auto teeg`n mutten hoaln. En die was volgens mi-j ök wel uut zichzülf è-stopt denk ik. Toen bi-j “Bakker” achteruut, ‘De Bouw” in.
Fiets mar achter de drumband an zee`n ze teeg`n mi-j. Veur mi-j was dat al heel wat. Ik had et gevuul dat et applaus van et publiek veur de drumband ök een beetie veur mi-j bestemd was. Ik heb ök nog wel is een keer een stukkie è-loop`n as et op die rotfietse niet zo goed meer gung. Mar arg best loop`n met mien geblesseerde rechterbien kun ik ök niet.
Ach weet ie, ik heb as verkeersregelaar niet veule hoeven te doen. Wat mi-j wel op
è-valn is, dat iederiene zo serieus er met bezig was dat er gien ongelukken gebeur`n. Mooi vund ik dat. En ök dat ik, al was et met een beroerde fietse, met heb kun doen. En woar et mi-j veural um te doen was, dat is ök ge gebeurd.
Ik heb enkele oalde kennisen van vrogger weer è-spreuk`n. Niet van van 125 joar geleen mar uut mien eigen jeugd.
Zodoende gung ik met een plezierig gevuul weer op huus an.

Toen ik de fietse weer trugge brachte zee ik tegen mien breur: Ie zult wel niet veule fietsen denk ik. Ie trapt oe broerd op dat ding.” “Dus et lig niet an mien conditie mar an de fietse”, zei hij.
Toen ik `s oams nog eem een paar briem op de busse mus doen en met mien eigen fietse op pad gung, dacht ik, toen dat een stuk makkelijker trapte:
Mu-j mar gien fietse goan lien as ie d`r zulf iene hebt.

Juni 2010
Henk Vos
Dedemsvaart

 

3 REACTIES

Laat een antwoord achter aan Herman Annuleer reactie

Vul alstublieft uw commentaar in!
Typ je naam hier